Hindi lang Korean — DepEd | SPANISH, FRENCH, GERMAN, CHINESE AT JAPANESE ITUTURO SA HAYSKUL

BAGAMA’T, hindi umano papalitan ang araling Filipino sa Basic Education Curriculum (BEC), ituturo naman sa mga piling mag-aaral ang anim na dayuhang lengguwahe.

Ayon kay Education Secretary Leonor Briones, bukod sa Korean language, ituturo rin bilang elective sa BEC ang Spanish, French, German, Chinese at Japanese.

Ito ay kasabay sa pagbibigay-linaw ni Briones na hindi papalitan ng Korean language classes ang Filipino subject sa BEC.

Elective lang umano ang Korean language class at hindi bahagi ng core subjects ng BEC at ito ay ituturo sa 700 mag-aaral sa 10 piling junior high schools sa National Capital Region.

Kasama na rito ang tinaguriang Special Program in Foreign Language (SPFL) classes na kasalukuyang ipinatutupad sa mga pampublikong paaralan.

Binatikos ang DepEd kamakailan matapos ideklara ng Korte Suprema na ‘constitutional’ ang pagtatanggal sa Filipino at Panitikan bilang bahagi ng core college courses.

Nilinaw naman ng DepEd na ang mga estudyante na hasa sa Filipino at English ang kuwalipikadong kumuha ng Korean language elective class.