Hirit ng mga guro: “Biktima rin kami ng pambu-bully”!
SA ngayon marami ng kaso ng bullying sa bansa ang napabalita, lalo na sa mga eskuwelahan kung saan iba’t ibang istorya na ang ating natunghayan tungkol sa pang-aabuso ng mga guro sa kanilang mga estudyante.
Gayunman, sa ginanap na forum kamakailan, sa pamamagitan ng tarpaulin at chants, ipinahayag ng mga guro na maging sila ay biktima rin ng pambu-bully ng kanilang mga mag-aaral.
Ayon sa mga guro, kapansin-pansing ang mas pinagtutuunan ng pansin ng mga kinauukulan ay ang mga kaso ng pang-aabuso sa mga mag-aaral, pero hindi alam ng karamihan na maging sila ay nakararanas din umano ng panlalait, masasakit na salita at marami pang iba.
Dahil dito, nais nilang isulong muli at amyendahan ang Teachers’ Protection Act na naglalayong proteksiyunan ang mga guro, lalo na ngayong kaunting isyu lang tungkol sa grado ay madali nang manira ng reputasyon sa social media.
Dagdag pa rito, masyado raw umanong nakatali ang mga guro sa dami ng mga batas na pumoprotekta sa mga estudyante, samantalang, sa kanila ay kakaunti lamang at hindi pa ganu’ng kalakas at katatag.
Kaya bukod sa classroom management at child discipline at legal assistance, dapat ay magkaroon din ng mechanism o manual ang mga guro para malaman nila kung ano ang mga hindi nila dapat gawin nang sa gayun ay magkaroon ng kaayusan sa pagitan ng mga estudyante at kanilang mga pangalawang magulang.
Gayundin, hiling natin na sana ay magkaroon ng patas na proteksiyon ang pamahalaan para sa lahat.
Tuldukan ang pang-aabuso na nakapagdudulot ng masamang epekto sa tao!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments