ACES, SHOOT SA FINAL

SWAK ang Alaska Aces sa championship round matapos nilang payukuin ang Meralco Bolts, 99-92 sa Game 4 ng 2018 Philippine Basketball Association, Governors Cup best-of-five semifinals kagabi sa Cuneta Astrodome sa Pasay City.

Magtatapat sa best-of-seven finals ang Aces at Magnolia.

Kumapit ang Meralco sa tikas ng Alaska sa unang dalawang periods kaya nakalamang sila ng isang puntos, 48-47 sa halftime.

Pero nakahulagpos ang Aces sa third canto, nilagok ang 21-12 para hawakan ang 68-60 bentahe papasok ng fourth.

Samantala, naunang sumampa sa finals ang Magnolia matapos nilang tapusin ang paghihirap ng Barangay Ginebra, 112-108 sa Game 4 ng kanilang best-of-five seminals noong Biyernes sa Ynares Center, Antipolo.

Hindi nagpapigil si import Romeo Travis sa asam nitong isampa sa finals ang Pam­bansang Manok Hotshots, kumayod siya ng 50 points at 13 rebounds.

Ayon kay Travis may nararamdaman itong sakit sa hita kaya ayaw niyang magkaroon ng Game5. “I didn’t want a Game 5,” hayag ni Travis “The way my leg is feeling, I couldn’t play in Game 5.”

“It’s a Grade 2 hamstring injury,” patungkol ni Magnolia head coach Chito Victolero sa nararamdaman ni Travis. “Nakaraan pa niya iniinda yan hirap siya, pero bago ang Game 4 ay nakakuha siya ng clearance.”

Nagpakitang gilas din ang locals ng Hotshots na sina Paul Lee, Jio Jalalon, Ian Sangalang at Mark Barroca sa kanilang panalo. (ATD)