14th month pay para sa mga empleyado ng private sector, ibigay!
“MABUTI pa sila”, ito ang sinabi ng ilang mga empleyado sa private sector matapos ianunsiyo ang pag-apubra sa 14th month pay at P5,000 cash bonus para sa mga empleyado na nagtatrabaho sa gobyerno kaya dahil dito, nais isulong ng mambabatas ang 14th month pay para sa kapakinabangan ng lahat.
Kung saan sinabi ni Kabayan Representative Ron Salo na karadapat-dapat din umano ang private employees na makatanggap ng 14th month pay hindi lamang dahil sa humanitarian reason kundi dahil nagsisilbi rin ang mga ito sa publiko tulad ng mga nagtatrabaho sa gobyerno.
Aniya, kukumbinsihin ng Kabayan Partylist ang Kongreso na amyendahan ang Labor Code nang sa gayun ay maging mandatory na ang 14th month pay at year-end bonus.
Malaki kasi ang maitutulong nito para sa mga gastusin ngayong darating na Pasko at Bagong Taon gayundin, magkakaroon ito ng magandang epekto para sa ekonomiya ng bansa dahil maaari nitong matugunan ang mga pangangailangan ng bawat pamilya.
Samantala, hiling ng partylist na sana ay masuportahan din ng mga negosyante ang kanilang panukala.
Gayunman, gustuhin man ito ng lahat, nakasalalay pa rin sa pamahalaan ang magiging tugon nila sa ating mga kahilingan.
Nakadepende rin kasi ito sa kakayahan ng ilang kumpanya, lalo na kung ang negosyong kanilang pinatatakbo ay hindi gaanong maganda ang kinikita.
Pero, kung malaki ang tsansa na mapagbigyan nila ang lahat, eh, di mas maganda.
‘Ika nga sa kasabihan, hangga’t may buhay, may pag-asa!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments