PAGULAYAN, PINAGHARIAN ANG 2 EVENTS SA SPARKLE SC

NAGPAKITA nang malupit na porma ang Pinoy cue artist na si Alex “The Lion” Pagulayan upang pagharian ang da­lawang events sa 2018 An­nual Sparkle City Shootout sa Steakhorse Restaurant & Billiards ng Spartanburg, South Caro­lina.

Dinaig ni Pagulayan ang 94 iba pang bilyarista upang angkinin ang trono ng 10-ball na bakbakan.

Kasama sa mga pina­kitaan ng tubong Isabela ng husay ang mga bati­kang kababayang sina Warren “The Warrior” Kiamco at Dennis “Robo­cop” Orcullo. Nakarating sa hotseat si Pagulayan matapos niyang sipain pa­­punta sa one-loss brac­ket si Orcullo.

Hindi na nakaahon si Orcullo mula rito at sa halip ay ang pambato ng Cebu na si Kiamco ang nakaabanse sa finals. Pero hindi na pina­porma ni Pagulayan ang Cebuano.

Nasa listahan din sa mga naghangad sa titulo ngunit umuwing bigo ang mga bigating cue artists tulad nina Carlo “Black Tiger” Biado, Johnny “The Scorpion” Archer, Francisco “Django” Bus­ta­mante, Skyler Wood­ward, Zoren James “Do­dong Diamond” Aranas, Jonathan Pinegar at Tony “T-Rex” Chohan.

Sa panghimagas na event ng kompetisyong dinaos na sa panglimang taon, nagsilbing sprint ang One Pocket event at hi­nawi ni Pagulayan sina Pi­negar, Bustamante Danny Smith upang ma­tagum­pay na makuha ang ko­rona.

Hindi naman nakasa­bay sa karipas ni Pagula­yan sina John Morra ng Canada, Can Salim, J. Burd, Chohan, Josh Ro­berts, Orcullo at Kiamco.