Babala sa mga dinurugo!
Dear Doc. Shane,
Akala ko, ang mga nakukunan lamang ang niraraspa kasi dinudugo ako ng ilang araw, sobrang lakas at ang sabi sa akin, kailangan daw akong iraspa para matukoy ang dahilan ng aking pagdurugo. Totoo ba ito? — Edna G.
Sagot
Ang raspa o dilatation and curettage (D&C) ay isang pamamaraan na isinasagawa upang makakuha ng maliit na bahagi ng laman mula sa loob ng matris. Isinasagawa ito ng mga doktor upang matukoy at magamot ang ilang kondisyon sa matris tulad ng sobrang pagdudrugo at para malinis ang loob ng matris pagkatapos malaglag ang ipinagbubuntis. Ginagamitan ito ng instrumentong bakal na tinatawag na ‘curette’ na maaaring may talim sa dulo o panghigop (suction).
Paano ba isinasagawa ang raspa?
Ang proseso nito ay mabilis lamang na karaniwang tumatagal ng 15 hanggang 30 minuto. Ang pasyente ay maaaring bigyan ng general anesthesia kung saan makakatulog ito habang isinasagawa ang pagraraspa o spinal anesthesia kung saan kalahati lamang ng katawan ang mamamanhid. Ipinapasok ang instrumentong curette sa loob ng matris upang makakuha ng maliit na bahagi ng laman. Ang laman na nakuha ay pag-aaralan sa laboratoryo. Matapos isagawa ang pagraraspa, maaari nang dalhin sa recovery room ang pasyente habang hinihintay ang resulta.
Gayunman, maaari itong irekomenda ng doktor kung mayroong abnormal na pagdurugo sa matris o para matukoy ang ilang kondisyon sa matris tulad ng kanser, pagtubo ng mga polyps at pangangapal ng mga gilid ng matris. Gayundin, para maiwasan ang impeksiyon at patuloy na pagdurugo.
Comments