Sexual violation sa kabataan, nakababahala!
NATURAL na sa mga magulang ang protektahan at alagaan ang kanilang mga anak.
Kasama sa nakaatang na responsibilidad natin ang kanilang basic needs sa araw-araw, ang bigyan sila ng pagmamahal at tulungan silang maabot ang kanilang mga pangarap sa buhay.
Kaakibat ng mga responsibilidad na ito ang pagbibigay sa kanila ng proteksiyon mula sa pang-aabuso.
Minsan, mapapaisip talaga tayo kung bakit mayroong mga halang ang kaluluwang nagagawang pagsamantalahan ang mga menor-de-edad, lalo na ang mga kaso na person of authority ang salarin kaya talagang nabahala ang inyong lingkod sa balita na umano ay pananamantala ng isang pulis sa 15-anyos na anak na babae ng dalawang drug suspects.
There is no excuse that can justify ang paglapastangang tulad nito kaya tayo ay naniniwalang napapanahon nang itaas ang age of consent sa bansa.
Sinasabi sa National Baseline Study on Violence Against Children (NBS-VAC) noong 2016 na isa sa limang batang may edad na mas mababa sa 18-anyos ang nakaranas na nang sexual violation.
Ang mas nakalulungkot, alam ba ninyong kabilang ang Pilipinas sa mga bansang may pinakamababang age of consent? Ibig sabihin, hindi na maaaring patawan ng kaso ng statutory rape ang mga umabuso sa biktima na pasok na sa minimum age of consent na 12 years old.
Kung iisipin natin noong tayo ay 12-anyos pa lamang, ano ba ang alam natin sa mga maseselang bagay na ito at hindi ba, sobrang mura pa ang isip ng 12-anyos upang gawin itong minimum age of consent?
Bilang ina, ito ang ikinatatakot natin para sa seguridad ng ating mga anak kaya nais nating amyendahan ang Senate Bill No. 1895. Mula sa 12-anyos ay magiging 16 yrs. old na ang minimum age sa pagtukoy ng statutory rape sa isang menor-de-edad.
Nakasaad sa ating Anti-Rape Law na masasabi lamang na statutory rape ang pang-aabuso kung ang biktima ay mas bata sa 12-anyos o mentally challenged.
Nakababahala dahil kung susundin ang batas, itong kaso ng 15-anyos na anak ng drug suspects ay hindi na matatawag na statutory rape, samantalang, it is clear in our minds na dapat ay maituring itong statutory rape.
Ginagamit na loophole ng ilan ang mababang age of consent na ito upang takasan o lusutan ang mas mataas na penalties from their crimes against children. Ito ang nais nating baguhin sa pagsusulong sa nasabing panukalang-batas.
Sa ilalim ng SB 1895, magiging liable for statutory rape na ang taong nagkaroon ng sexual relations or intercourse sa isang menor na below 16 years old.
Sa pamamagitan nito, mas mapoprotektahan natin ang kabataan mula sa pang-aabuso. Ipanalangin nating sa lalong madaling panahon ay matalakay at maaprubahan ito upang mabigyan ng karampatang-proteksiyon ang masa, marami pa sa ating mga anak na walang kalaban-laban ang maaaring mabiktima ng mga masasamang-loob.
Comments