Search
  • BULGAR

Dapat malinaw at tama ang paggastos sa pondo ng eskuwelahan

KUYA WIN GATCHALIAN / WIN TAYONG LAHAT

HUMIGIT-KUMULANG na dalawang de­kada nang simulan ng Department of Education (DepEd) na pagkalooban ang mga paaralan ng Maintenance and Other Operating Expenses (MOOE) sa pangangasiwa ng mga punong-guro.

Layunin ng MOOE na maiangat ang ka­kayahan ng mga eskuwelahan na magbigay ng school supplies, masuportahan ang mga pro­gra­mang pang-edukasyon, maipagkaloob ang ligtas at malusog na kapaligiran sa mga mag-aaral maging ang mga school personnel.

Itinalaga ang mga punong-guro ng bawat paaralan upang i-monitor ang Special Education Fund, Parent-Teachers Association, canteen, alumni association, renta o collection fees at iba pa.

Dapat maging malinaw at tama ang pag­gastos ng lahat ng pondong ito na naaayon sa Republic Act 9184 o Government Procurement Reform Act.

Ang alokasyon ng MOOE ayon sa DepEd Order No. 13, s. 2016 ay magagamit ng pa­aralan sa mga sumusunod:

  • Pambili ng school supplies at mga gamit sa pagtuturo.

  • Pangrenta at pampagawa ng minor repairs ng gusali at mga pasilidad.

  • Suweldo ng mga janitor at security guard.

  • Pambayad ng kuryente, tubig, telepono at internet.

  • Suportahan ang programang kurikulum base sa School Improvement Plan at Annual Im­plementation Plan at pangunahan ang school-based training, Learning Action Cell para sa mga guro at iba pa.

  • Pambayad sa mga gastusin ng Graduation Day at Recognition Day.

  • Para sa maliliit na gamit sa pag-aaral na hindi lalagpas sa P15, 000.

Base sa International Journal of Scientific Technology Research, hangad dapat ng mga guro at mga kinauukulan na magkaroon ng ma­linaw at bukas na paggamit ng pondo ng MOOE upang makapagpanatili at magdulot ng kabuuang pagtitiwala sa paghawak nito. Sa tulong ng tapat at maayos na pakikipagtulu­ngan sa Commission on Audit (COA), magiging posible ito.

Sa kabila ng tulong na ito ng pamahalaan, may mga guro na kinakailangan pa ring mag­labas ng personal na panggastos para sa mga kagamitan sa pagtuturo sa halip na kunin sa pondo ng MOOE.

Ngunit, dahil sa matinding pagmamalasakit sa kanilang mga estudyante para lamang matuto at makausad sa kanilang lessons sa klase, hindi na nila iniinda kahit mabawasan ang kanilang take-home pay.

Walang guro ang dapat mamili o mag-abono para sa pangangailangan ng eskuwelahan dahil mayroong pondo mula sa MOOE.

Ang mga punong-guro na siyang direktang nangangasiwa sa pondo ng MOOE ay may pa­nanagutan sa pagiging totoo at tapat sa kani­lang nasasakupan, lalo na sa nakikinabang ni­tong mga mag-aaral.

Lahat ng kanilang mga pagpapasya ay nag­papakita ng integridad sa kanilang tungkulin at kabutihan sa iba kaya hindi ito dapat ipinagsa­sawalambahala.

Malaki ang paniniwala ng ating mga guro maging ang mga magulang na ang MOOE ay malaking tulong at biyaya para mapunan ang mga pangunahing pangangailangan sa edu­kasyon ng mga bata.

Mapatutunayan ito base sa magiging resulta ng antas at kalidad ng kaalamang matatanggap ng mga batang mag-aaral pagdating ng pa­nahon kaya gamitin nang husto at maayos ang pondong ito dahil naka­salalay dito ang ma­kabuluhang karanasan ng bawat kabataan.

0 comments

Disclaimer : The views and opinions expressed on this website or any comments found on any articles herein, are those of the authors or columnists alike, and do not necessarily reflect nor represent the views and opinions of the owner, the company, the management and the website.

RECOMMENDED
BULGAR LOGO

Bulgar Online.

Call us : (02) 995-3732

© 2021 bulgaronline

Sison's Publishing House, Inc.