Pedicab driver na holdaper, utas sa pulis

DEDO ang isang pe­di­cab driver na unang nang­holdap sa kanyang pasahero mata­pos maki­pagbarilan sa mga tumu­tugis na pulis sa Ca­loocan City.

Kinilala ni SPO4 Wyrlo Gatoc ang nasa­wing suspek na si alyas Waray, nasa 30-35 ang edad.

Nauna rito, sakay si James Lucero, 37, sa pe­dicab na minamaneho ng suspek subalit, pagsapit sa Salmon St., Bgy. 8, naglabas ng ka­libre .38 revolver si ‘Waray’ sabay pahayag ng holdap at sapilitang kinuha ang mga gamit ng biktima bago tu­makas.

Nakahingi naman ng tulong ang biktima sa mga tauhan ng CIDG na nag­sasagawa ng Oplan Pag­tu­gis, Salikop malapit sa na­turang lugar.

Alas-12:15 ng hating­gabi nang maispatan ng mga tauhan ng CIDG sa pangu­nguna ni Sr. Insp. Jayson Quijana ang sus­pek subalit, sa halip na sumuko, bumunot uma­no ito ng baril at pinapu­tukan ang mga pulis.

Nauwi sa barilan ang mga ito hanggang sa tamaan ang suspek sa katawan na nag­resulta ng kanyang ka­matayan.

Narekober ng pulisya sa nasawi ang kalibre .38 re­volver, 7 plastic sachets na naglalaman ng hindi pa ma­tukoy na halaga ng hinihi­nalang shabu at plas­tic sachet ng pinatu­yong dahon ng mari­juana.