Bilang ng mga krimen na sangkot ang kapulisan, nakababahala!
NAKADIDISMAYA!
Totoong nakadidismaya ang mga nangyayaring krimen sa ating bansa dahil kung ating babalikan, marami na ring insidente ang kinasangkutan ng ilan nating kapulisan.
‘Yung sila sana ang manghuhuli, sila pa ang hinuli at kinasuhan dahil sa paggawa nila ng katiwalian.
Mayroong pumatay, nanloko, sangkot sa droga, lumabag sa karapatang-pantao, kasabwat ng mga sindikato, nangotong, sangkot sa kidnap-for-ransom, panggagahasa at marami pang iba.
Hindi ba, dapat sila ang pumoprotekta pero bakit sila pa ang gumagawa ng hindi maganda?
Kaya hindi rin natin masisisi ang mamamayan kung bakit nawawalan na sila ng tiwala sa kanila, lalo na at mukhang mas dumarami pa ang mga pulis na pasaway kaysa sa mga matitino at may mabuting-asal.
Ang tanong, kailan kaya ito mahihinto? Kung kailan dinoble ang kanilang sahod ay saka pa sila naging pasaway.
Gayunman, hindi natin nilalahat ang kapulisan, ang sa atin lang ay sana matuto at magbago na sila dahil hindi maganda sa tuwing may kaso na silang kinasasangkutan.
Bukod kasi sa nakahihiya ito ay nakasisira pa ng imahe ng Philippine National Police (PNP).
Samantala, ang hiling lang natin ay magampanan sana nila ang kanilang tungkulin para sa bayan, ibigay nila ang lahat ng kanilang makakaya nang sa gayun ay magkaroon na ng kaayusan ang bansa.
‘Yung kung ano ang dinoble ng kanilang sahod, gayundin sana ang pagdoble nila sa kanilang serbisyo at patunayan nila sa lahat na karapat-dapat silang magkaroon ng ranggo.
Gayundin, para sa mga matitigas talaga ang ulo, magsitino na kayo!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments