Maling politika ang dahilan ng mabagal na rehabilitasyon sa Marawi

FR. ROBERT P. REYES / KAPAAYAPAAN

IPINAGDIWANG noong nakaraang Miyerkules, ika-17 ng Oktubre, ang unang anibersaryo ng kata­pusan ng giyera sa Marawi. Pagka­tapos ng isang taon, wasak pa rin ang Marawi at tila hindi pa rin tiyak kung paano mang­yayari ang reha­bilitasyon dito. Na­banggit ang P20 bilyon bilang hala­gang inilaan ng pa­ma­halaan para rito. Gayunman, hindi ma­linaw kung saan manggagaling ang kabuuang halaga para sa rehabili­tas­yon. Madalas ma­bang­git ang China na maaari raw magbigay ng tulong-teknikal at pinansiyal ngunit, ina­bot na ng isang taon ay hindi pa rin ganu’n kalinaw ang ano, pa­ano, sino at magkano ang rehabilitasyon ng Marawi. Ano ang nag­­papabagal o nag­pa­pa­bilis sa takbo ng mga proyekto at pro­grama ng pamaha­laan? Ang malinaw na sagot, politika!

◘◘◘

Natapos na ang deadline ng filing ng certificate of candidacy (COC) sa Co­me­lec. Lumabas na ang mga mukha at pangalan ng mga tatakbo para sa iba’t ibang puwesto ng pamahalaan. Naka­gugulat at nakapag­tataka ang bilang ng tatakbong senador, isandaan at limampu’t dalawa (152) ang tatakbong kandidato sa Senado. Gayundin, ang bilang ng mga partylist na umabot ng isandaan at walumpu’t lima (185). Ang ta­nong, sino sa mga kandidato ang may­roong tunay na diwa ng kapaya­paan sa kan­yang puso at handang magsakri­pisyo?

Matagal na pana­hon na nating narana­san ang political dynasty kung saan ito ang may hawak ng poder at kabuhayan sa mga lalawigan, siyudad at bayan.

Piyudal pa rin ang ating bansa at kitang-kita ito sa mga nag-file ng COC. Mayro­ong mga bagong mukha at pangalan, ngunit, halos lahat ay walang ipinagkaiba.

Nakalulungkot ang sinabi ng kaibigan natin noong naka­ra­ang araw, tila magi­ging masaya raw ang marami sa darating na pitong buwan. Magsi­simula na ang kam­panya at eleksiyon kaya pitong buwan daw tayong may hanapbuhay sapagkat babaha ang salapi mula sa mga kan­didato.

Maraming bahag­yang giginhawa ang buhay sa susunod na pitong buwan, subalit, posible rin na dumami ang karahasan dulot nito tulad ng paninira, lokohan, takutan at gipitan na karaniwang gawain ng maraming kandidato. Ito ang ka­la­karan na ng politika kaya huwag na ta­yong magtaka kung maba­gal ang rehabilitasyon ng Ma­rawi. Gayun­man, ka­ilan kaya ma­gi­gising ang nakara­rami, hindi lang sa tamang politika kundi sa tunay na kapaya­paan?