2 mangingisda, dedbol sa blast fishing

ni Jeff Tumbado @News | August 3, 2026

Photo: File Blast Fishing / PNP Regional Office

Dedo ang dalawang mangingisda habang sugatan ang isa pa matapos sumabog ang hinihinalang improvised explosive device (IED) na umano'y ginagamit nila sa ilegal na pangingisda sa Dasol, Pangasinan, Sabado ng hapon.

Ayon sa Pangasinan Provincial Police Office, ilang mangingisdang nasa lugar ang nakarinig ng malakas na pagsabog sa dagat. Nang kanilang puntahan ang pinagmulan nito, natagpuan nila ang tatlong mangingisda na sugatan at agad na sinagip.

Lumabas sa imbestigasyon na nagsasagawa ng blast fishing ang mga biktima nang ito'y biglang sumabog.

Nagtamo ng matinding pinsala ang tatlong mangingisda at agad silang isinugod ng Dasol Emergency Response Team sa Dasol Community Hospital. Gayunman, idineklarang dead-on-arrival ang dalawa sa mga biktima, habang patuloy namang ginagamot ang nakaligtas na mangingisda.