11-anyos, inabuso ng stepdad

ni Maeng Santos @News | November 6, 2026

Photo: File

Kulong ang 28-anyos na lalaki matapos akusahan ng seksuwal na pang-aabuso sa 11-anyos na anak ng kanyang kinakasama sa Malabon City.

Sa ulat ni Malabon police chief P/Col. Kenneth Mission kay NPD Director P/BGen. Benliner Capili, wala sa kanilang bahay sa Brgy.Catmon ang ina ng biktima nang halayin umano ng suspek noong Martes ng madaling-araw.

Pinagbantaan umano ng suspek ang biktima na huwag magsusumbong subalit, naglakas loob pa rin ang bata na sinabi sa kanyang ina ang ginawa ng amain.

Humingi ng tulong sa pulisya ang mag-ina kaya agad nagsagawa ng operasyon ang mga tauhan ni P/Maj. Joseph Alcazar, na nagresulta sa pagkakaaresto sa suspek.