1,500 kawani ng Coast Guard nakarekober na sa COVID-19

ni Lolet Abania | September 23, 2020

Umaabot sa 1,500 personnel ng Philippine Coast Guard (PCG) na tinamaan ng Coronavirus ang nakarekober na sa sakit.

Sa pinakabagong datos ng PCG, naitala na sa 1,569 na kawani na infected ng virus, may kabuuang 1,492 ang nakarekober dito. Mayroon na lamang 77 active cases sa kanilang personnel.

Wala ring record ng namatay, ayon sa Coast Guard. Samantala, sa layuning maiwasan ang pagkalat at transmission ng COVID-19 sa kanilang hanay, pormal nang bubuksan ngayong buwan ng PCG ang kanilang quarantine facility na may 224 beds para sa mga frontliners.

"This facility will allow the PCG Medical Service to better manage the active COVID-19 cases within the organization for their speed recovery and rehabilitation," ayon sa PCG.

Dagdag pa rito, patuloy ang ginagawang swab testing sa staff at personnel ng PCG. Tinitiyak ng pamunuan ng Coast Guard na regular ang supply ng vitamins, PPE sets at medical supplies.

Nagpapatupad din ng mahusay na deployment upang masiguro na ang isang frontline personnel ay nagkakaroon ng pahinga sa kanilang trabaho, nakakakain ng masusustansiya para lumakas ang immune system nito at gumagamit ng UV lights bilang karagdagan sa manual disinfection ng kanilang work stations at iba pang lugar.