“Zombie drug” vape, banta sa kalusugan ng kabataan

by Info @Editorial | February 21, 2026

Nakababahala ang lumalaking bilang ng mga estudyante at kabataan na gumagamit ng vape na may halong tinatawag na zombie drug—isang kemikal na matindi umano ang epekto sa katawan at utak. 

Hindi ito simpleng trend; delikado ito, at maaari itong mag-iwan ng permanenteng pinsala sa kalusugan.

Ang zombie drug ay kilala sa pagiging sobrang nakaaadik at nakakaapekto sa utak ng kabataan. 

Ang mga estudyanteng gumamit nito ay naglalagay sa sarili sa panganib na hindi agad nakikita—ang pagiging cool sa mata ng barkada ay kapalit ng seryosong banta sa kalusugan.

May batas na sa Pilipinas, na nagre-regulate sa bentahan ng vape, ngunit tila hindi naipatutupad nang maayos.

Kadalasan, mahirap mapigilan ang paggamit nito dahil sa impluwensiya ng social media at peer pressure.

Dapat maging malinaw sa kabataan: ang paggamit ng zombie drug vape ay hindi biro. Hindi ito uso; delikado ito at maaaring magbunga ng permanenteng pinsala.

Kinakailangan ang mas istriktong edukasyon sa paaralan, mahigpit na pagbabantay ng magulang, at mas masigasig na pagpapatupad ng batas upang maprotektahan ang kabataan.

Ang kalusugan at kinabukasan ng kabataan ay hindi dapat isugal. Panahon na upang maging maingat, disiplinado, at may alam sa banta ng ganitong uri ng bisyo.