ni Dr. Shane Ludovice - @Sabi ni Dok | March 4, 2021
Dear Doc. Shane,
Namamaga ang isang binti ng aking tatay. Nag-iiba ang kulay nito dahil medyo madilaw. May cancer siya sa atay at natigil na sa pag-chemo niya. Sa bahay na lang siya at ayaw magpagamot. Ano ang dapat gawin? – Anton
Sagot
Tinatawag na “edema” ang pamamaga ng mga paa, bukong-bukong at binti. Dahil ito sa labis na mga tubig na naiipon sa mga tissue. Dahil sa gravity, napupunta ang labis na tubig sa katawan sa pinakamababang bahagi. Ito ang dahilan kaya ang mga binti at paa ang pinaka-apektado.
Kabilang sa mga sanhi ng edema ay:
Sakit sa puso (congestive heart failure o “CHF”)
Matagal na pagtayo o pag-upo (na nakababa ang mga binti)
Impeksiyon sa mga paa o binti
Venous Insufficiency (pamumuo ng dugo sa mga ugat ng binti)
Varicose veins (lumaking mga ugat ng ibabang binti)
Mga garte, o damit na nasasakal ang mga binti
Buwanang dalaw na may fluid retention
Renal insufficiency (isang anyo ng sakit sa bato o kidney)
Pagpalya ng atay
Pagbubuntis
Makatutulong ang mga sumusunod:
Huwag magsuot ng pantalon na makakasakal sa mga binti
Itaas ang mga binti habang nakahiga o nakaupo
Kung ang impeksiyon, pinsala o kamakailang operasyon ang sanhi ng pamamaga, huwag gamitin ang mga binti hanggang sa bumuti ang mga sintomas
Kapag sinabi ng doktor na ang pamamaga ng binti ay sanhi ng venous insufficiency o varicose veins, huwag umupo o tumayo sa isang lugar nang matagal
Magpahinga at maglalakad-lakad
Mahalagang magpakonsulta agad sa doktor kapag napansin ang ilan sa mga ito:
Bago o lumalalang kakapusan sa paghinga o pananakit ng dibdib
Tumitinding pamamaga sa parehong mga binti o bukong-bukong
Pamamaga ng tiyan
Pamumula, pagiging mainit o pamamaga ng isang binti
Lagnat na 100.4ºF (38ºC) o mas mataas pa
Naninilaw na balat o mga mata
Mabilis, hindi maipaliwanag na pagbigat ng timbang