Utang ng PhilHealth sa Red Cross, relax lang, babayaran din — P-Du30

ni Ronalyn Seminiano Reonico | October 20, 2020

Inanunsiyo ni Pangulong Rodrigo Duterte nitong Lunes na gagawa ng paraan ang pamahalaan upang mabayaran ang multi-million utang sa Philippine Red Cross matapos ihinto ng organisasyon ang pagsasagawa ng COVID-19 tests na pinopondohan ng Philippine Health Insurance Corp. (PhilHealth).

Saad ni P-Duterte, "Ditong Red Cross, h'wag kang mag-alala, mabayaran ito. We're just looking for a way to present the solution to sa COA, pati sa budget (department). Do not worry. We will pay. It will take time, but we'll pay. We'll look for the money.

"Hindi naman marami, but ang priorities natin dito is really medical--medical treatment, medical attention. Babayaran ito in a short while. Do not worry.”

Nagsasagawa ang PRC ng 1 million COVID-19 tests ngunit ayon sa organisasyon, hindi na sila tatanggap ng specimens para rito hanggang hindi nagbabayad ang PhilHealth sa P930 million nitong utang.

Makikipagkita rin umano si P-Duterte kay Red Cross Chairman Sen. Richard Gordon upang maituloy nito ang pagsasagawa ng mga hakbang laban sa COVID-19. Aniya, "I do not think Senator Gordon would have it in his mind to stop.. [but] what I'm really trying to say is we will pay.

"Money has always been a problem everywhere. Dumaan tayo sa malaking gastos and we are trying to make both ends meet. Parang lastiko, talagang binabanat natin nang husto iyong resources natin.”