Uminom ng gatas ng baka at ‘di pinagbilhan ang kapitbahay

ni Estrellia de Luna - @Panaginip gabay ng buhay | March 30, 2022

Analisahin natin ang panaginip na ipinadala ni Tony ng Batangas.

Dear Maestra,

Marami akong alagang baka rito sa probinsiya at ito ang pinagkakakitaan namin. Halos buong araw, pag-aalaga ng baka ang aking pinagkakaabalahan at pati sa pagtulog ay ito pa rin ang aking iniisip. Marahil, ‘yan ang dahilan kaya napanaginipan ko na ginagatasan ko ang mga baka namin, tapos marami akong nakuhang gatas.

Hindi ako nakatiis at ininom ko ang gatas dahil uhaw na uhaw ako at nakalimutan kong magdala ng tubig. Tapos dumating ‘yung kapitbahay ko at gusto niyang bumili ng gatas pero hindi ko siya pinagbilhan.

Ano ang ibig sabihin ng panaginip ko?

Naghihintay,

Tony

Sa iyo, Tony,

Maganda ang ipinahihiwatig ng panaginip mo na ginagatasan mo ang baka at ininom mo ‘yung gatas. Nangangahulugan ito ng kasaganaan at pag-unlad sa buhay kung saan tuloy-tuloy ang pag-asenso mo at yayaman ka na.

Sa kabilang dako, ang sabi mo ay dumating ang kapitbahay mo at gustong bumili ng gatas, pero hindi mo siya pinagbilhan. Mabuti na lang at hindi mo siya pinagbilhan dahil kung nagkataong pinagbilhan mo siya ng gatas, ang ibig sabihin nito ay kalungkutan. Daranas ka ng matinding lungkot sa iyong buhay at magiging mailap ang kaligayahan.

Matapat na sumasaiyo,

Maestra Estrellia de Luna