ni Nympha Miano-Ang - @Life and Style | October 1, 2020
Gusto ba ninyo bilang magkakapitbahay na maging matiwasay, malinis at ligtas sa COVID-10 at maunlad ang lugar? Huwag lang basta uupo at maghintay na mangyari ito. Heto ang ilang paraan upang mas maging mapayapa, malinis, hindi mabaho at asensado ang tinitirhang lugar.
1. GUMAWA NG AKSIYON. Hindi puwedeng paupo-upo ka na lang at hintayin ang komunidad na magkaroon ng pagbabago. Kailangan ninyong magtulungan. Alamin kung ano ang iyong magagawa para makamit ang kaunlaran ng komunidad. Dumalo sa community meetings at mag-ambag ng kaunting barya.
2. IBOLUNTARYO ANG SARILING ORAS, LAKAS, PERA AT SARILI. Mayroon bang park clean up day, tara na, magboluntaryo ka. Magboluntaryo kang tumulong na magwalis ng kapaligiran, maglinis ng mga kanal na pinamumugaran ng mga lamok na nagdadala ng peligrosong dengue fever, magtanim ng mga halaman, magpintura ng mga pader etc. Bumuo ng isang grupo at mangolekta ng mga basura sa daan at magtanim ng mga punongkahoy sa tabi ng kalye o gitna ng daan, maging sa mga pasyalan o pampang ng ilog at tabi ng dagat. Magboluntaryong magluto ng sopas at iba pang pagkain sa mga walang tahanan.
3. KILALANIN ANG MGA KAPITBAHAY. Kilalanin ang mga taong nakatira malapit sa inyo. Magtatag ng malakas na komunidad ay isa nang team effort. Magkaroon ng grupo na kikilala sa lahat ng mga nakatira sa lugar at gawing layunin na mas matiwasay, mapayapa at malinis at ligtas ang kapitbahayan laban sa COVID-19. Palagiang ipaalala sa kanila ang mga health protocols na kailangan upang makaiwas sa virus. Palaging maghugas ng kamay gamit ang sabon at malinis na tubig, mag-social distancing at iwasan ang pagdidikit-dikit at dapat laging malinis sa katawan maging sa kapaligiran.
4. SUPORTAHAN ANG MGA LOKAL NA NEGOSYO. Mamili sa mga lokal na negosyo at iwasang bumili ng imported materials.
5. PANGALAGAAN AT KALINGAIN ANG MGA MAKASAYSAYANG ESTABLISIMYENTO O IYONG MGA HERITAGE SITE AT LUGAR. Huwag hayaang masira o mawasak ang mga ito. Manguna o tumulong sa fundraising projects para sa pananatiling matatag, malinis at maayos ang mga lumang gusali. Ipreserba ang magandang kasaysayan ng komunidad.
6. SUPORTAHAN ANG MGA LOKAL NA LIDER. Lumahok sa pagboluntaryo maging sa mga kampanya ng proyekto tulad ng malawakang paglilinis ng mga daluyan ng kanal, tanggalin ang mga plastik na makakapagbara upang maiwasan ang mga pagbaha tuwing tag-ulan. Pairalin ang Tapat Mo, Linis mo na mentalidad sa bawat residente upang maiwasan ang iba't ibang uri ng sakit. Magboluntaryo rin sa oras ng halalan. Kilalaning mabuti ang mga pulitikong kandidato para sa inyong lugar. Tiyaking nakapagsaliksik ka at sapat ang kaalaman mo sa layuning ng mga kandidato at mga isyu bago mo siya iboto. Pagdating sa oras ng halalan, at least di masasayang ang boto mo at tiyak kang malinis, masipag, may tunay na malasakit at hindi corrupt ang inyong pulitiko.
7. SIMULAN ANG NEIGBORHOOD WATCH. Tiyaking ligtas ang inyong komunidad kapag nagtatag ng neighborhood watches. Ang bawat miyembro ng komunidad ay dapat magpoproteksiyunan sa bawat isa. Kung may nakasusupetsahang tao o mga nakasususpetsang aktibidad sa isang kapitbahay, kontakin na agad ang pinakamalapit na himpilan ng pulisya. Ang pagiging vigilante ng magkakapitbahay ay para matiyak ang kaligtasan ng isa’t isa.
8. MAGING MAPAGPASENSIYA. Isipin sa kagustuhang maging matiwasay at payapa ang lugar ay hindi naman ito nangyayari ng isang gabi lang. Kailangan nito ng panahon, lakas at pera bilang puhunan para ganap itong maisakatuparan. Huwag basta uupo at maghintay na mangyayari ito. Kailangan n’yo na ngayong kumilos!