Talamak na pekeng gamot, aksyunan

by Info @Editorial | January 30, 2026

Nagkalat ang mga pekeng gamot. Hindi ito maliit na problema at hindi rin dapat palampasin. 

Ang pekeng gamot ay walang bisa, mali ang sangkap, at delikado sa katawan. Sa halip na gumaling ang pasyente, lalo pa siyang napapahamak.

Patuloy itong kumakalat dahil may mga nagbebenta at may mga bumibili. Murang presyo ang pain, pero buhay ang kapalit. Lalo na online, madaling magbenta ng gamot kahit walang permiso at walang pananagutan. Hangga’t mahina ang pagpapatupad ng batas at kulang ang kaalaman ng publiko, tuloy ang panloloko.

May kasalanan ang mga sindikatong gumagawa at nagbebenta ng pekeng gamot, pero may pananagutan din ang pamahalaan. Hindi sapat ang paalala kung walang mahigpit na aksyon. Kailangan ng regular na inspeksyon, mabilis na pagsasara ng ilegal na tindahan, at mabigat na parusa sa mga lumalabag.

Sa mamamayan, simple lang ang panawagan: huwag bumili ng gamot sa hindi rehistradong tindahan, huwag magtiwala sa murang alok. Ang pagtitipid sa gamot ay hindi matipid kung kalusugan ang nawawala.

Hindi dapat maging normal ang pagbebenta ng pekeng gamot. Isa itong krimeng tahimik na pumapatay.