Sino pa ang proprotekta sa mamayan, kung pulis ang kriminal?

by Info @Editorial | January 31, 2026

Nagkalat ang pulis-holdaper. Hindi na ito tsismis, hindi na rin iisang kaso lang. May mga pulis na ginagamit ang baril at uniporme para mangikil, manakot, at magnakaw. Sa halip na proteksyon, takot ang ibinibigay sa mamamayan.

Mas masakit, madalas ay lusot. Mabagal ang imbestigasyon at napapako ang kaso. Dahil dito, lalong lumalakas ang loob ng mga abusado at lalong nasisira ang tiwala ng publiko sa buong kapulisan, pati na sa mga pulis na tapat naman sa tungkulin.

Hindi sapat ang salitang “may aksyon.” Kailangan ng tanggalan, kulungan, at malinaw na parusa. Walang espesyal na trato dahil lang may uniporme. Kung ang pulis mismo ang holdaper, doble ang kasalanan—sa batas at sa taumbayan.

Kung hindi ito haharapin nang diretso, tuluy-tuloy ang pang-aabuso. 

At sa huli, ang tanong: sino pa ang poprotekta sa mamamayan kung ang pulis ang kriminal?