Simot-sarap na baon ideas ngayong Undas

ni Marry Rose Anterio (OJT) @Lifestyle | October 30, 2025

Para sa karamihan, ang pagkain ay isa sa mga paraan upang magbuklod-buklod ang pamilya, mapa-simpleng agahan, tanghalian, o hapunan dahil ang pagsasalo-salo ay isa sa mahalagang tradisyon nating mga Pilipino.

Kaya tunay na may saysay ang pagkain ng sabay-sabay kahit pa sa pangkaraniwang araw lang natin ito gagawin.

Gayunman, sa paggunita natin ng All Saints’ Day at All Souls’ Day, importanteng malaman natin ang mga simot-sarap na pagkain at ideas na pasok sa budget at panlasang Pinoy.

Bukod sa mga kandila at bulaklak, hindi maikakaila na isa rin sa nakasanayan nating mga Pilipino tuwing Undas ang pagdadala ng mga baon kasabay ng pagdalaw sa mga yumaong mahal sa buhay.

Kaya naman, narito ang mga pagkaing swak dalhin sa darating na Undas:

Adobo – Itinuturing na pambansang ulam sa bansa, nag-ugat ito sa sinaunang paraan ng mga Pinoy na pagpreserba ng mga karne gamit ang suka at asin bago pa dumating ang mga Kastila na kalauna’y nadagdagan ng toyo at iba pang pampalasa.

Fried Chicken – Bagama’t mula sa western country, siguradong hindi ka mapapahiya kapag ihain dahil niyakap na ito ng mga Pinoy bilang paboritong handa sa halos lahat ng okasyon.

Lumpia – Nagmula sa China na tinatawag na spring roll, nilagyan ito ng Filipino touch gamit ang lokal na sangkap tulad ng karne, repolyo, at karot na patok at hinahanap-hanap ng mga Pinoy sa kada salo-salo.

Pancit – Kabilang din sa mga impluwensya ng China, mas kilala ito bilang pampahaba ng buhay at madalas na iniaalay sa mga puntod ng mga mahal sa buhay.

Bilang Pilipino, hindi puwedeng mawala ang mga matatamis at malagkit na bigas na may gata at asukal tulad ng sapin-sapin, bibingka, at suman na simbolo ng pagkakapit-bisig ng pamilya. Tradisyunal itong inihahanda tuwing Undas bilang alay at pampasalubong sa mga bumibisita sa sementeryo. Nagmula ito sa sinaunang paraan ng pagluluto ng bigas at niyog ng mga Pinoy.

Ngayong Undas, magandang planuhin ang bawat pagkain na pagsasaluhan mula sa masasarap na ulam hanggang matatamis na kakanin -- ang diwa ng pagmamahalan at pagmamalasakit sa paggunita at pagdarasal para sa mga mahal nating yumao dahil nagsisilbing tagubilin ito na habang buhay ang kanilang mga alaala.