Shoutout sa mga strong independent woman d’yan... Sure ka bang tatanda kang single?

ni Mharose Almirañez | February 27, 2022

Nakakarindi pakinggan ang paulit-ulit na tanong ng tita’t tito’s of Manila na walang ibang bukambibig kundi abalahin ang iyong love life. ‘Yung tila mas worried pa sila sa ‘yong pagtandang-dalaga. Samantalang ikaw, halos wala ka man lang pakialam sa dami ng lalaking lumagpas sa buhay mo.

Batid naming ikaw itong strong independent woman who doesn’t need a man for a living (sana all, ‘di ba), pero minsan ba ay naitanong mo na rin sa ‘yong sarili, kung hanggang kailan ka magiging ganyan ka-strong?

No man is an island, ‘ika-nga.

Alam naming pakitang-tao mo lang ang pagiging strong, dahil weak ka naman talaga inside. Ikaw ‘yung ayaw makaabala sa iba, kaya sasarilihin mo na lang ang lahat ng bumabagabag sa ‘yo. Ikaw ‘yung nagninilay-nilay sa gabi at tinatanong ang kapalaran kung bakit napaka-unfair ng mundo.

Siyempre, alangang sagutin ka ng apat na sulok ng pader, at kahit magtitigan pa kayo magdamag ng kisame—hinding-hindi rin ‘yan sasagot. Walang makaririnig sa ‘yo, hangga’t hindi mo tinitibag ‘yung mataas na pader sa pagitan ninyo ng mga taong lumalapit sa ‘yo. Hangga’t naka-padlock ‘yung sarado mong isip. Hangga’t you’re not enough ready to lower your guard.

Sabi nga ni Maestro Honorio Ong, malaki ang impluwensya ng Astrolohiya at Numerolohiya sa personalidad ng isang tao. Gayunman, gabay lamang ang mga ‘yun, sapagkat ikaw pa rin ang gagawa ng sarili mong kapalaran.

Kung pakiramdam mo nama’y planado mo na ang iyong future, ‘wag kang pakasisiguro dahil ang buhay ay punumpuno ng surpresa. Kahit pa gaanuman ka-detail oriented ‘yang pina-plantsa mong future, may isang tao pa ring maglalakas-loob na tibagin ang iyong pader. Kumbaga, hawak nito ‘yung susi na mag-aalis sa iyo sa ‘yong comfort zone.

Sa oras na dumating ang araw na ‘yun, sana piliin mo ang maging masaya.

Tandaan, you only die once, kaya ‘wag kang pumayag mamatay nang hindi nararanasang sumalungat sa agos. Hindi ka totoong strong kung hindi mo naranasang madapa, masugatan, masaktan at umiyak. Hindi masamang magpakita ng kahinaan. Kaya sana, ‘wag kang matakot papasukin ang lahat ng taong kumakatok sa iyong buhay. Okie?