SB19, PINARANGALAN NG SENADO DAHIL SA GLOBAL SUCCESS

by BRO @Entertainment | September 29, 2026

Photo: SB19 kinilala ng Senado / Joseph B. Vidal - Senate Social Media Unit

Kinilala ng Senado ang SB19 dahil sa mga naging tagumpay ng grupo sa international music scene at sa pagdadala ng musikang Pilipino sa pandaigdigang entablado.

Personal na tinanggap ng grupo ang Senate Resolution No. 545, na kumikilala sa kanilang performance sa Lollapalooza Chicago 2026 at ambag sa creative industries ng bansa.

Ayon kay Sen. Bam Aquino, unang homegrown Filipino act ang SB19 na nagtanghal sa Lollapalooza noong Hulyo 30 sa Grant Park sa Chicago.

Pinuri rin ng mga senador ang limang miyembro ng grupo—Pablo, Josh, Stell, Ken at Justin—at ang A’tin bilang mahalagang bahagi ng kanilang tagumpay.

Binigyang-diin ni Aquino ang potensiyal ng creative industries na makalikha ng trabaho at oportunidad para sa mga Pilipino, habang sinabi ni Sen. Kiko Pangilinan na dala ng SB19 sa mundo ang musika, wika, kultura at talento ng bansa.