Taas-singil sa toll, lahat sapul

by Info @Editorial | Mar. 4, 2025

Isyu ngayon ang posibleng pagtaas ng presyo ng mga bilihin kasunod ng pagtaas ng singil sa toll fee sa North Luzon Expressway (NLEX). Habang ang gobyerno at mga operator ng tollways ay may mga paliwanag ukol sa pangangailangan ng pagtaas upang mapanatili ang kalidad at seguridad ng mga daan, tiyak na may epekto rin ito sa pang-araw-araw na buhay ng bawat isa, lalo na sa mga mamimili at negosyante. 

Ang dagdag na toll fee ay may direktang epekto sa mga negosyo, partikular sa mga naghahatid ng mga produkto at serbisyo. 

Kapag tumaas ang gastos sa transportasyon, maghahanap naman ang mga negosyante ng paraan upang makabawi, at ang isa sa mga karaniwang solusyon ay ang pagtataas sa presyo ng mga produkto, na nagiging sanhi ng karagdagang pasanin sa mga konsyumer. Ito ang tinatawag na domino effect.

Tulad ng karaniwang epekto ng inflation, ang ganitong uri ng pagtaas sa gastos ay maaaring magpalala sa problema ng hindi pagkakapantay-pantay sa lipunan. 

Ang mga hindi kayang magbayad ng dagdag na toll fee at ang mga hindi kayang sumabay sa patuloy na pagtaas ng presyo ng mga bilihin ay higit na maaapektuhan. 

Sa kabila nito, hindi naman maikakaila na ang pagtaas sa toll fee ay isang hakbang patungo sa pagpapabuti ng mga imprastruktura. 

Sa katunayan, ang mas pinahusay na kalagayan ng mga daan ay maaaring magdulot ng mas mabilis at mas ligtas na biyahe, na sa huli ay makikinabang ang taumbayan sa mas magaan na daloy ng kalakal. 

Gayunman, ang mga pagtaas ng presyo ay dapat pag-aralan at tiyakin na hindi magdudulot ng labis na pasanin sa mga ordinaryong tao. 

Kaya ang hamon na kinakaharap natin ay ang pagbalanse sa mga pangangailangan ng mga negosyo, imprastruktura at ang kapakanan ng mga mamimili.