Produktong naka-sachet, malamang tataas ang presyo, hmmm…

@Editorial | July 17, 2022

Kapag natuloy ang pagbubuwis sa mga single-use plastic, posibleng tumaas ang presyo ng mga produktong nakalagay sa sachet.

Kabilang sa mga maaapektuhan ay ang mga pagkain o sangkap na kinukonsumo sa araw-araw. Ito 'yung mga nakalagay sa sachet na pawang single-serve quantities na mas mura kumpara sa mga full-sized packs.

Bagay na sinasabing indirect taxing sa mga mahihirap.

Batid naman natin na may mga wala namang sapat na kakayahang makapamili nang biglaan dahil sa limitadong budget. Mayroon paisa-isa ang bili depende sa pangangailangan sa mismong araw. Kaya kung tataas ang buwis sa single-use plastic na hindi malayong mag-domino effect sa produkto, tiyak na kamot-ulo na naman ang publiko.

Halos bayad-utang na nga rin ang sistema ng marami, tataas pa ang presyo, ano nang mangyayari?

Matatandaang isinusulong ni Department of Finance Secretary Benjamin Diokno ang pagbubuwis sa mga single-use plastic hindi lamang para labanan ang climate change at para na rin makalikom na dagdag-pondo ang gobyerno.

Sana, may iba pang paraan na parehong hindi malalagay sa alanganin ang mga negosyante at mamimili at siyempre ang ating kalikasan.