Pondo para sa maliliit at malalayong ospital, ‘wag kaligtaan

by Info @Editorial | November 22, 2025

Sa gitna ng kontrobersiya sa pondo at proyekto sa ilang ahensya ng gobyerno, isa pa sa pinangangambahan ay ang sa Department of Health (DOH) kaugnay ng umano’y hindi patas na proseso ng pagba-budget para sa mga ospital. 

Sinasabing mas napapaboran ang malalaking medical centers kaysa sa maliliit na ospital sa malalayong lugar sa bansa. Matagal na umanong napapansin ang malalaking agwat sa pagpopondo.Kinuwestiyon din ang pamahalaan hinggil sa kawalan pa rin ng tertiary hospitals sa ilang rehiyon, sa kabila ng tinatayang P190 billion pondo para sa

health facility investments sa nakalipas na 15 taon.Tila may problema talaga sa sistema.

Mas napapaboran ang mataong sentro kaysa sa mga lugar na mas nangangailangan ng tulong. 

Dahil dito, lumalawak ang agwat ng kalidad ng serbisyong pangkalusugan — at ang kawalan ng tiwala ng publiko sa pamahalaan.Kung sinasabi ng gobyerno na prayoridad ang kalusugan, dapat ay makita ito sa paglalaan ng pondo. Hindi dapat maging depensa ang kakapusan lalo’t tumambad na ang bilyones na napupunta lang sa bulsa ng iilan.

Hindi makatarungan na may mga ospital na modernong-moderno habang ang iba ay kulang sa gamot, kama, at tauhan.

Kung seryoso ang pamahalaan na pagandahin ang serbisyo, unahin ang mga ospital na matagal nang nakakalimutan. 

Ang pantay na access sa kalusugan ay hindi luho, ito’y karapatan.