Paulit-ulit na trahedya dahil sa kapabayaan

by Info @Editorial | June 19, 2026

Ang pagguho ng isang hotel sa Pampanga at ang mahigit P11 milyong multa na ipinataw ay hindi dapat matapos sa usapin ng penalty lamang. Ito ay malinaw na paalala na may seryosong problema sa pagpapatupad ng building standards at permitting system sa bansa. 

Kapag ang mga gusali ay naitayo nang may kakulangan sa seguridad o lumihis sa pamantayan ng batas, ang kapalit ay buhay at kaligtasan ng publiko.

Hindi sapat ang parusa kapag tapos na ang pinsala. Ang P11 milyong multa ay dapat magsilbing simula ng mas mahigpit na pagsusuri. Kung ang mga inspeksyon ay nagiging pormalidad lamang, at ang permit ay puwedeng i-bypass sa impluwensiya o kapabayaan, paulit-ulit lang ang ganitong trahedya.

Kailangan ang mas agresibong monitoring mula sa LGUs, engineers, at national agencies—mula design approval hanggang aktwal na konstruksyon. 

Ang gusaling hindi sumusunod sa batas ay hindi lamang isyu ng permit; ito ay isyu ng disiplina sa industriya at pananagutan sa publiko.