Patok na tips para mapagkakitaan ang libangan

ni Nympha Miano-Ang - @Life and Style | August 8, 2020

Panahon ng pandemic, mas uso ang orders online. Maliliit ang mga negosyong dapat na tulungan, marami na ang nagtatagumpay sa larangan na iyan at nagsimula lang ang marami sa paggawa ng kinahihiligang bagay o hobby na ginawa nang pagkakitaan.

Ang husay di po ba? Kaya kung kayo ay may isang bagay na hilig gawin ay gawin na ngayon na isang negosyo at huwag nang mag-aksaya ng panahon lalo na kung may konting puhunan na maaring magamit na para rito.

Pero paano ka ba magi-start. Heto ang ilang hakbang upang iyong hobby ay maging ganap na kapaki-pakinabang para maging isang propesyong mamahalin, pauularin at aalagaan.

1. PALAWAKIN ANG POSIBILIDAD. Konsiderahin ang kikitain sa gagawing negosyo o kaya’y full time na itong trabahuhin. Magsaliksik online para sa anumang business categories na maaring pasukin ayon na rin sa hilig na gagawin para mapagkakitaan. Gayundin ang listahan ng mga grupo o kaibigan na maaring makatulong at magpaunlad ng iyong ginagawa at magtanong sa kanila kung ano ang unang dapat na gawin lalo na sa websites o social media.

Tingnan ang mga local social media at humanap ng reference materials na may kaugnayan sa iyong hobby upang maging negosyo. Halimbawa, hilig mo ang pagluluto o pagbe-bake. Simulan na ang pagre-research o pagbabasa ng magasin online tungkol sa klase ng resipe ng iyong kinahihiligang gawin. Tunghayan din ang mga gawa ng paboritong pinakamahuhusay na modelong chef na maaring tularan na estilo pagdating sa dekalibreng mga lutuin. Kung health conscious ka alamin ang mga nababagay na lutuin para sa mga gulay at iba pang nutritious ingredients na magagamit sa iyong recipe. Suriiin din ang pinakapatok na presentation na alam mong bentang-benta para sa iyong target markets.

Alamin na ring mabuti kung ano ang mga kailangang kagamitan na kukumpleto sa iyong hobby na gagamiting pang-negosyo. Sa pamamagitan ng mga materyales na iyan ay mabibigyan ka ng impormasyon upang makaisip ka ng paraan kung paano sisimulan ang food industry business.

Sa quick job search din ng websites maari kang makahanap ng makatutulong sa iyo lalo na sa career builders o kaya naman kahit kasambahay lamang na handang makatuwang sa’yo sa paglunsad ng food business ay sila na ang magiging pasuwelduhan mo. Tiyak na sa iyong bahay lamang available ang mga makakatulong sa iyong bisnis. At sa isang maliit na puwesto lamang sa harapan ng bahay puwede nang magkaroon ng panaderya para sa bake business.

2. HINGIN ANG PAYO NG MGA EKSPERTO. Kung mayroon kang hinahangaang guru o eksperto sa isang bisnis na nais mong simulan, maaring available sila sa social media at tanungin kung anong mga seminar mayroon sila, networking groups para sa bago at prospektibong sariling negosyo na sisimulan kahit sa maliit na paraan muna.

Ang mga local business partners naman ang siyang magbibigay payo at referral para sa iyong tulong na source at sila rin ang gagabay kung paano ito ima-market online. Puwedeng mag-enrol sa kolehiyo o unibersidad para sa business. Konsiderahin din sa trabaho ang tamang interes. Magkaroon ng first hand experience at makausap ang contact perons na kailangan oras na pasimulan ang negosyo.

Kung may maliit na puwesto ka namang paglalagakan ng iyong bisnis ay maari na rin doon na simulan. Tiyakin din na makakuha ka ng business permit mula sa barangay at iba pang lisensiya kung kinakailangan.

3. MAGLAAN NG SIMPLENG MARKET RESEARCH. Makipag-usap sa tao at mga negosyante sa lugar at magtanong ng feedback hinggil sa ideya ng negosyo. Upang mas maging mahusay na tagapangalaga ng mga halaman o mag-breed ng magagandang uri ng mga prutas. Ang mga horticulturist o mga hinahangaang agriculturist ang siyang hingian ng ng payo upang magkaideya ka sa negosyo at malaman kung saang lugar ka maaring magpasimulang palawakin ang serbisyo kung talagang hilig mo ang paghahalaman.

a. MAGLAAN NG SIMPLENG PLANONG BISNIS. Maraming uri ng aklat ang magtuturo ng paglikha ng simpleng business, step-by-step. Anuman ang gagawin,huwag kalimutan ang hakbang na ito.

4. GAWIN NA AGAD KUNG KAILANGAN. Oras na nakagawa ka na ng pasya upang maging negosyo ang iyong hilig at maging isang pagkakakitaan, gawin na ito ngayon, sumige ka na!

Sa isang eksaktong talento ng babae sa pag-aalaga ng iba’t ibang uri ng bulaklak at kinahihiligang flower arrangement sa kanyang hardin, sa buong kabahayan niya maging sa pamimigay niya ng ganito sa kanyang kaanak at kaibigan ay naisipan na niya isang araw na maglaan ng marami pang materyales upang pagkakitaan na ito.

Sampung pirasong flower arrangements ang kanyang ginawa, katuwang niya ang kanyang anak at nagtayo siya ng local selling shop, naibenta niya nang mabilis ang proyekto maging sa social media.

Ngayon ay regular na siyang may order at tagumpay ang kanyang negosyo na nagsimula lamang sa maliit na puhunan.