Patakaran sa pagsusuot ng face shield, dapat linawin

@Editorial | November 20, 2021

Ilang araw matapos payagan ang hindi na pagsusuot ng face shield sa mga lugar na nasa Alert Levels 1, 2 at 3, kabilang ang Metro Manila, may inilabas na paglilinaw ang Inter-Agency Task Force (IATF).

Sa huling inilabas na resolusyon ng IATF, sinabi ni acting presidential spokesperson at CabSec. Karlo Nograles na bagama’t voluntary na lang ang paggamit ng face shield sa mga lugar na ito, binibigyang-diin na puwede pa ring i-require ng mga employers at maging ng mga pribadong establisimyento sa kanilang mga kawani at parokyano ang paggamit nito. Bagay na nagdudulot ngayon ng kalituhan, lalo na sa publiko. Ang alam kasi ng karamihan ay hindi na mandatory ang face shield, paano kung may mga lugar na bigla pala itong ire-require? Posibleng mauwi pa sa hindi pagkakaunawaan.

Ang mga ganitong laban-bawi na panuntunan ang dapat na iwasan. Samantala, sa usapin naman ng on site capacity sa mga tanggapan ng gobyerno, ipinaalala na ang mga nasa Alert Level 4 ay mayroon hanggang 40% minimum capacity. Sa mga nasa Alert Level 3, 60% ang pinapayagang minimum capacity, habang ang nasa Alert Level 2 ay pinapayagan na ang sa 80% minimum capacity.