Para iwas-gulo, sumunod sa batas ng ‘Pinas

@Editorial | February 26, 2022

Kasabay ng pagluluwag sa mga panuntunan sa gitna ng pandemya, partikular sa pagpapapasok sa mga dayuhan, nagpaalala ang Bureau of Immigration (BI) sa mga ito na magparehistro sa ahensiya hanggang March 1 upang makapaghain ng kanilang 2022 annual report (AR).

Nakasaad sa Alien Registration Act na dapat mag-report nang personal ang BI-registered aliens sa ahensiya sa unang 60-araw kada taon.

Sinumang dayuhan ang bigong makapaghain ng AR ay maaaring maharap sa parusa, kabilang ang multa o deportation.

Hinikayat ang mga hindi pa nakakapaghain ng kanilang AR na kumuha nang slot sa pamamagitan ng online appointment system ng BI. Obligadong sumunod sa annual reportorial requirement.

Katulad ng pagsunod ng mga Pinoy sa mga patakaran sa ibang bansa, ganundin ang inaasahan sa mga dayuhang pumapasok naman dito. Sa pamamagitan nito ay maiiwasan ang hindi pagkakaunawaan.

Paalala rin sa mga kinatawan ng ahensiya ng gobyerno, tiyakin nating naipatutupad nang maayos at tama ang bawat patakaran. Bawal ang shortcut at palakasan. Gawin natin ang sistema. Sakaling may mga pasaway, ipataw ang batas at hindi palusot.

Ipakita natin sa mga dayuhan na tayo’y tapat at may respeto sa mga panuntunan na tayo rin ang may gawa alang-alang sa kapakanan ng bawat mamamayan.