Pangarap na sumikat sa pagkanta, matutupad habang abala sa hanapbuhay

ni Maestro Honorio Ong - @Kapalaran ayon sa Palad | November 14, 2022

KATANUNGAN

1. Ako ay mahilig kumanta, pero ang problema, hindi naman ako nananalo sa mga singing contest na sinasalihan ko, kaya ngayon ay balak kong bumalik sa dati kong trabaho bilang isang welder.

2. May aplikasyon ako ngayon sa abroad at nag-aayos na ako ng mga papeles. Gusto kong malaman kung matutuloy ba ako sa pangingibang-bansa o dapat ba na kahit palagi akong talo sa mga singing contest ay ituloy ko ang hilig kong ito? Gayundin, dapat ba akong umasa na dumating ang panahon na magkakaroon din ako ng break at sisikat bilang singer?

3. Ano ang masasabi n’yo, Maestro, saan ba talaga ako nakatakdang sumikat at yumaman, sa pagwe-welding o pagkanta?

KASAGUTAN

1. Ang sabi mo ay palagi kang talo sa mga amateur singing contest, hindi naman masama kung magpahinga ka muna at mag-abroad dahil kapansin-pansing may malawak at makapal na Travel Line (Drawing A. at B. t-t arrow a.) sa kaliwa at kanan mong palad.

2. Ibig sabihin, kung sa paligsahan sa pag-awit ay palagi kang bigo, sa pag-a-abroad at sa pamamagitan ng isa mo pang talent o pagwe-welding, sigurado na ang magaganap, sa unang hati ng taong 2023 at pinakamatagal na sa buwan ng Abril o Mayo 2023, may mabunga at mabiyayang pangingibang-bansang itatala sa iyong kapalaran.

MGA DAPAT GAWIN

1. Hindi naman masamang pagsabayin ang pag-abot ng ating mga pangarap tulad ng kasalukuyan mong karanasan, Lester, kung saan pinagsasabay mo ang pag-awit at pagwe-welding, pero siyempre, dapat may diskarte rin. Kung palagi kang bigo sa pangarap mong pag-awit o natatalo ka sa mga singing contest, ibig sabihin ay kulang ka lang sa practice.

2. Kaya mas makabubuting balikan mo muna ang iyong skill o tutukan mo muna ang pagwe-welding, kung saan tama ang iyong balak na mag-abroad dahil siguradong sa susunod na taong 2023 at sa edad mng 33 pataas, may mabunga at mabiyayang pangingibang-bansa na itatala sa iyong kapalaran. Gayundin, sa ibayong-dagat, habang nagwe-welding ka, isang napakagandang pagkakataon ding kumanta-kanta ka upang lalo pang mapraktis ang pag-awit at matupad ang iyong pangarap na sumikat sa larangan ng pagkanta.

3. At kapag alam mo nang magaling ka na talagang kumanta dahil praktisado ka, sa iyong pagbabalik sa ating bansa, muli kang sumali sa mga singing contest. Ayon sa iyong malinaw at kumapal na Sun Line (Drawing A. at B. S-S arrow b.), sa nasabing larangan at sa nasabing panahon, maaaring manalo at sumikat ka na bilang magaling at mahusay na mang-aawit.