Pahiwatig na malalagpasan ang mga problema sa buhay

ni Estrellia de Luna - @Panaginip gabay ng buhay | January 09, 2022

Analisahin natin ang panaginip na ipinadala ni Flora ng Bataan.

Dear Maestra,

Napanaginipan ko na nasa ospital ako at nakatakdang operahan sa kidney. Tapos dumating ang dati kong kaibigan, subalit naging kaaway ko rin siya sa bandang huli.

Dinalaw niya ako sa ospital kung saan ako naka-confine. Ano ang ipinahihiwatig ng panaginip ko?

Naghihintay,

Flora

Sa iyo, Flora,

Ang ibig sabihin ng panaginip mo na nakatakda kang operahan sa kidney ay kabaligtaran. Ito ay nagpapahiwatig na tuluyan kang gagaling sa iyong karamdaman at mawawala na ang sakit mo sa kidney.

Samantala, ang sabi mo ay dinalaw ka ng kaaway mo sa ospital, ito naman ay nagpapahiwatig na malalagpasan mo ang anumang balakid o sagabal sa kaligayahan mo. Nangangahulugan din ito ng kasaganaan sa darating na mga araw. Malulutas na ang iyong problemang pinansiyal kaya giginhawa na ang iyong buhay.

Matapat na sumasaiyo,

Maestra Estrellia de Luna