Pagpapatrol sa gabi at checkpoints ng PNP, paigtingin pa

@Editorial | September 5, 2022

Ayon sa Philippine National Police (PNP), mula July 1 hanggang August 31 ay umabot na sa 149 ang naitalang kaso kaugnay sa pang-aabuso o krimen, kung saan mga babaeng estudyante ang nabibiktima.

Sa nasabing record ng PNP, mayorya nito'y kasong rape sa Metro Manila.

Pero sa kabila nito'y hirit ng PNP ay huwag umanong mag-panic ang publiko, partikular ang mga magulang.

Sa totoo lang, sa kaliwa't kanang police report ng mga nawawalang indibidwal, normal lamang sa kahit sinong magulang ang hindi kakalma, lalo pa't face-to-face classes ang sistema natin ngayon. Ang mga estudyante ay malayang nakalalabas, na siya ring pagkakataong ginagamit ng masasamang loob para makapambiktima.

Kaya naman, bilang mga tagapagpatupad ng kapayapaan, pagkakataon ito kung saan dapat doble o kung puwede sana’y triple ang gawing pagbabantay ng kapulisan.

Tipong, baka puwede nilang dalasan ang pagpa-patrol, lalo na sa gabi? Palagi rin sanang may checkpoint sa bawat lugar.

Bukod sa stats o bilang ng mga krimen at paulit-ulit na payong maging vigilant sa paligid, pagtatrabaho ng husto ang puwede pang ibigay ng kapulisan sa ating mga kababayan.