Paghahatid ng hustisya, panahon na para makasabay sa teknolohiya

@Editorial | September 14, 2022

Aprub ang bago at napapanahong programa ng Korte Suprema.

Kaugnay ito ng real-time na paghahatid ng hustisya para sa mga Pilipino.

Ang real-time na hustisya ay hindi lamang patas, transparent, accountable, at inclusive, ito rin ay may kakayahang sumabay sa mga pagbabago sa teknolohiya.

Binubuo na ng “Virtual Hearings and Electronic Testimony Committee” ng Korte Suprema ang mga magiging panuntunan para maging tuluy-tuloy na ang mga pagdinig ng kaso sa pamamagitan ng videoconferencing kahit pa matapos ang pandemya.

Sa pamamagitan ng videoconferencing, hindi na masyadong gagastos, makakatipid pa sa oras, lalo na ang mga nasa malalayong probinsya. Sa pamamagitan nito, mas mapabibilis at mas mapaghuhusay pa ang mga legal na serbisyo para sa lahat.

Ang mga kababayang Muslim at ang mga tinatawag na “refugee” at “stateless person” ay sinisiguro rin ng Hudikatura na magkakaroon ng “access” hindi lang sa impormasyon kundi maging sa mga pinaghusay pang “legal aid initiatives” nito.

Masasabing isa ito sa magagandang pagbabago sa kabila pandemya dulot ng COVID-19. Natuto tayong tanggapin ang mahirap na sitwasyon at nakagawa tayo ng paraan kung paano makakasabay sa kinahaharap na mga hamon.