ni Ka Ambo @Bistado | Pebrero 7, 2023
Tinatangkang baguhin ang Konstitusyon.
Diyos ko, Diyos ko, bakit mo ako pinabayaan?
Hindi nila alam ang kanilang ginagawa.
---$$$---
Makikita natin na ang pagkapanalo sa eleksyon ay hindi kasingkahulugan ng pagiging mahusay o matalino.
Bagkus ito ay sukatan lang ng popularidad at dami ng salapi sa kampanya.
---$$$---
Naunawaan kaya ng mga senador at kongresista ang wagas na kahulugan ng Saligang Batas o Konstitusyon?
Sa depinisyon pa lamang ay madaling maintindihan kung dapat bang baguhin ang Konstitusyon.
---$$$---
Ang terminong “Konstitusyon” ay hiram na kataga mula sa banyagang “Constitution” na maikukumpara sa pisikal na katawan ng tao.
Ibig sabihin, kapag binago ang “Konstitusyon”, mistulang idinaan mo sa surgical operation ang iyong babaguhin.
Malinaw na nasa “hukay ang isang paa” ng ooperahan.
---$$$---
Malaki ang tama ni ex-Supreme Court Chief Justice Hilario Davide Jr. na delikado o mapanganib ang Cha-cha.
Ibig sabihin, gagamit ng anestisya o pampatulog ang mga siruhano.
Malinaw din na “malayang-malaya” ang mga siruhano sa kanilang “procedure” dahil walang kaalam-alam ang pasyente na siya ay isang “biktima”.
---$$$---
Sa depinisyon sa itaas, tumpak ang paniniwala ng iba na posibleng hindi lang “economic provision” ang ioopera.
At “sino” sila o ano ang kuwalipikasyon ng mag-oopera para ipaubaya ang “buhay ng pasyente”?
---$$$---
Kapag walang kakayahan ang mga nagpapanggap na siruhano, ang pasyenteng tinutukoy ay aktuwal na magiging biktima.
Ang mga “waiver” sa mga ospital, bago operahan ang isang pasyente ay karaniwang “pagtakas” lamang sa pananagutan ng mga siruhano — sakaling sadyain o hindi sadyain na lihis ang maging operasyon.
---$$$---
Ang People’s Initiative ay maituturing na isang “waiver” upang payagan ang “siruhano” na mag-opera.
Malaya ang siruhano na “guntingin o anuman ang gawin” sa pasyente habang natutulog.
---$$$---
Sa Tagalog, ginamit ang katagang “Saligan” o katumbas ng pundasyon ng bahay o gusali.
Magtanong kayo sa mga structural engineer kung dapat bang baguhin o galawin ang pundasyon kapag “hindi nagustuhan ang tirahan”.
Walang engineer na nagbubungkal ng “pundasyon” kapag nagdarahop sa buhay ang mga nakatira rito.
---$$$---
Kapag mahina ang gusali, hindi pa rin ang pundasyon ang ginagalaw, bagkus ay nagsasagawa ng tinatawag na “retrofitting” lang.
Reinforcement lamang ang ginagawa kapag humihina ang gusali o bahay.
---$$$---
Kung may problema sa Saligang Batas, reinforcement lamang ang kailangan — at ‘yan ay sapat nang gawin ng Kongreso o magpatupad ng mga bagong batas na naaayon sa Konstitusyon.
Malinaw na ang pagbabago ng Konstitusyon ay idinidikta ng mga dayuhang negosyante upang makontrol ang kayamanan at oportunidad sa pagnenegosyo.
---$$$---
Pinakagrabe, unlimited ang resources ng mga dayuhan sapagkat ang tunay na mithiin nito ay ipasok ang banyagang ideolohiya at burahin ang pagiging patriyotiko ng mga Pilipino.
Isang klase ng pagtataksil sa Inang Bayan ang pagtatangkang babuyin ang Konstitusyon gamit ang mga traydor sa lahing kayumanggi.
---$$$---
Hanggang ngayon, buhay na buhay pa rin ang mga “makapili”.
Nananatiling bulag, pipi at bingi ang mga apo nina Lapulapu, Balagtas, Rizal at Bonifacio.