P27.8 B budget, inilaan para sa national ID system

ni Lolet Abania | October 9, 2020

Umabot sa P27.8 billion ang pondo na ilalaan ng gobyerno para sa Philippine Identification System (PhilSys) at sa national ID, ayon sa Philippine Statistics Authority (PSA).

“We submitted the overall budget at the NEDA-ICC (National Economic and Development Authority-Investment Coordination Committee) last May 2020, and the budget is about P27.8 billion, that is the entire budget for the PhilSys,” sabi ni National Statistician at NEDA Usec. Dennis Mapa sa virtual press conference kanina.

Ipinaliwanag ni Mapa na nakapaloob sa P27.8-billion budget ang pag-hire ng mga tauhan para kumolekta ng door-to-door census data, pagkakaroon ng mga gadgets na gagamitin sa koleksiyon ng mga datos, nakalaang automated biometric identification system, systems integrator at cybersecurity component.

Binanggit din ng PSA chief na noong 2018, nagbigay ang pamahalaan ng P2 billion para sa PhilSys at para sa 2019 nagkaroon naman ng P2.1 billion. Ngayong taon, naglaan ng P3 billion.

“So, nasa P7.1 billion na ang naibigay lahat ngayon,” sabi ni Mapa.

“Dahil malaki ang target na mairehistro sa 2021, binigyan kami ng P4.1 billion budget,” dagdag niya.

Dagdag pa ni Mapa, nakakuha na ang PSA ng registration kits, automated biometric data collection system at systems integrator components para sa PhilSys.

Ayon naman kay Department of Information and Communications Technology (DICT) Usec. Dennis Villorente, bahagi ng kabuuang bayad sa systems integrator na nakuha ng gobyerno ay magagamit sa cybersecurity components para ma-secure ang IT infrastructure ng PhilSys.

“[Around] P2.2 billion ang ginastos ng PSA para sa systems integrator,” sabi ni Villorente.

Gayundin, ang natitirang budget para sa proyekto ng PhilSys ay gagamitin sa registrations at printing ng ID cards.

Samantala, ang Bangko Sentral ng Pilipinas (BSP) ang naatasang ahensiya na mag-print ng ID cards para sa PhilSys.

“Ang pinakamalaking gastos is ‘yung registration process at malaking component din ‘yung pag-produce ng ID mismo,” ani Mapa.

Simula January 2021, magiging nationwide na ang registration para sa national ID system matapos na makumpleto ng PSA ang unang lima hanggang siyam na milyong mahihirap na kababayan na makakapagrehistro sa nasabing ID system mula October hanggang December ngayong taon.

Sa tulong ng Department of the Interior and Local Government (DILG), nagsasagawa na sa mga pangunahing lalawigan ng registration ng national ID o Philippine Identification System (PhilSys).

“After the registration of low-income household heads, the PSA will make the registration available to the public in 2021 with the help of LGUs (local government units), partner agencies and other stakeholders,” sabi pa ni Mapa.