OFWs, protektahan laban sa scam

by Info @Editorial | December 14, 2025

Ang pagbabalik ng 71 Pilipinong nabiktima ng mga scam hub sa Myanmar ay hindi lamang masayang balita ngayong Kapaskuhan, kundi isang mahigpit na paalala sa panganib na kaakibat ng mga alok na trabaho sa ibang bansa na tila napakaganda upang maging totoo. 

Sa gitna ng kahirapan, kawalan ng trabaho, at mababang sahod sa bansa, madaling mahulog sa patibong ang mga umaasang makakahanap ng disenteng hanapbuhay abroad. 

Ginagamit ito ng mga sindikatong walang konsensiya—mga alok na mataas ang sahod, walang placement fee, at mabilis ang proseso. Ngunit sa halip na marangal na trabaho, pagkaalipin, pananakot, at karahasan ang sinasapit ng mga biktima sa loob ng mga scam hub.

Kaya dapat tiyaking rehistrado ang recruiter, may pahintulot ang trabaho mula sa pamahalaan, at legal ang papasuking bansa at kumpanya.

Higit pa rito, nananawagan ang pangyayaring ito sa pamahalaan na paigtingin ang kampanya laban sa illegal recruitment, palakasin ang pagbibigay-kaalaman sa mga komunidad, at tiyaking may sapat na trabaho at disenteng sahod dito mismo sa bansa. Hangga’t nananatiling desperado ang mamamayan, mananatiling bukas ang pinto sa panlilinlang.