Naka-unipormeng kriminal, tuluyan

by Info @Editorial | January 12, 2026

Namamayagpag na naman ang krimen, at mas masahol, may mga pulis na sangkot. 

Kapag ang kriminal ay may uniporme at baril ng gobyerno, doble ang pinsala. Hindi lang buhay at ari-arian ang nawawala, kundi pati ang tiwala ng mamamayan. 

Paano rerespetuhin ang batas kung ang nagpapatupad nito ang unang lumalabag?

Tama na ang palusot na “iilan lang sila.” Iilang pulis lang ba ang sapat para protektahan ang mga sindikato? Iilang pulis lang ba ang kayang magpaikot ng ebidensiya o magbenta ng proteksyon? Kung iilan man sila, bakit paulit-ulit?

May problema sa loob. May kultura ng pananahimik, takutan at palakasan. 

Simple ang dapat gawin: hulihin, imbestigahan, at ikulong ang sinumang pulis na sangkot sa krimen—walang special treatment. Tanggalin sa puwesto ang mga opisyal na nagtatakip. Gawing bukas sa publiko ang resulta ng mga imbestigasyon. Kung walang makulong, malinaw na may naglilinis ng rekord, hindi ng hanay.

Hindi ito laban sa matitinong pulis. Ito ay laban sa mga kriminal na sumisira sa kanilang pangalan. 

Kung seryoso ang gobyerno sa kapayapaan, magsimula ito sa sariling bakuran.