Mula Oct. 31 hanggang Nov. 15… 145 PLUS MOVIES, IPAPALABAS SA PISTA NG PELIKULANG PILIPINO 4

ni Vinia Vivar - @Frankly Speaking | October 11, 2020

Kahit may pandemya ay tuloy na tuloy pa rin ang Pista ng Pelikulang Pilipino (PPP). Ito ang deklarasyon ng Film Development Council of the Philippines chairperson na si Liza Diño and in fact, naghahanda na sila ngayon para sa ika-apat na edisyon ng naturang festival.

Isang malaking pagtitipon ng samu’t saring pelikula ang ika-4 na edisyon ng Pista ng Pelikulang Pilipino (PPP) na magpapalabas ng hindi bababa sa 145 na pelikula — 67 na full-length films at 78 na short films.

Bilang organizer ng PPP, inaanyayahan ng Film Development Council of the Philippines (FDCP) ang lahat ng stakeholders na magsama-sama at magkaisa para sa industriya ng pelikula.

Ang Sama All! na slogan, na tampok sa PPP4 poster, ay imbitasyon ng FDCP para sa PPP4 na gaganapin mula Oktubre 31 hanggang Nobyembre 15.

Ang key elements sa poster ay kumakatawan sa mga pelikulang kasama sa 14 na sections ng online festival: PPP Short Films, Romance, Youth & Family, Classics, PH Oscar Entries, Genre, Bahaghari, Tribute, From the Regions, Documentaries, PPP Retro, Special Screenings, CineMarya, at PPP Premium Selection.

Ang slogan na “PPP4, Sama All!” ay hindi lamang para sa mga filmmakers kung hindi para sa mga manonood din para mapahalagahan nila ang Philippine Cinema at makatulong sa hangarin ng FDCP na makapagbigay ng suporta sa industriya ng pelikula sa gitna ng COVID-19 na pandemya. Lahat ng proceeds mula sa sales ng PPP festival passes ay mapupunta sa lahat ng producers na kasama sa PPP.

“This year’s PPP may be different, but I assure that it will continue to celebrate the heritage and potential of our film industry by spreading the love for Philippine Cinema. The festival will also promote solidarity because ultimately, PPP 4 is one way to help sustain the Filipino film industry in light of the pandemic’s devastating effects,” sabi ni FDCP Chairperson at CEO Liza Diño.

Maliban sa QCinema, Sinag Maynila, Sine Kabataan, at CineMarya, tampok din sa PPP4 ang mga pelikula mula sa iba’t ibang producers at mula rin sa Cinemalaya Philippine Independent Film Festival, CineFilipino Film Festival at ToFarm Film Festival.

Ipapalabas ng Special Screenings section ang Mula sa Kung Ano ang Noon ni Lav Diaz.

Gaganapin ang PPP4 mula Oktubre 31 hanggang Nobyembre 15 sa FDCPchannel.ph platform.

Ang Early Bird Rate Pass na PHP 450 para sa 16-day Full Run Pass (PHP 599) ay mabibili hanggang Oktubre 15 lamang. Ang iba pang subscription options ay ang Half Run Pass (PHP 299) para sa walong araw, Day Pass (PHP 99), at Free Pass (para sa short films at public events).

Simula Oktubre 16, magkakaroon na ng discounts para sa persons with disabilities (PWDs) at senior citizens (20%) at mga mag-aaral (30%).

Para sa updates sa karagdagang PPP4 titles at iba pang impormasyon, bumisita sa FDCPchannel.ph o facebook.com/FDCPPPP.