Mga nandadaya sa pagkuha ng ayuda, sampulan

by Info @Editorial | February 16, 2026

Nagbabala ang Department of Social Welfare and Development laban sa paggamit ng pekeng dokumento para makakuha ng tulong mula sa Assistance to Individuals in Crisis Situation (AICS). 

Ang AICS ay para sa mga pamilyang nasa krisis—may sakit, walang pambayad sa ospital, o biglang nawalan ng kabuhayan. 

Kapag may nagsumite ng pekeng papeles at nakalusot, nababawasan ang pondong dapat mapunta sa lehitimong benepisyaryo. Isang peke na aprubado ay maaaring katumbas ng isang tunay na aplikanteng hindi natulungan.

Dapat managot ang sinumang mahuhuling nandaraya. Kasabay nito, tungkulin ng pamahalaan na higpitan ang beripikasyon at gawing malinaw at mabilis ang proseso upang maiwasan ang tukso at palakasin ang tiwala ng publiko.

Walang puwang ang panlilinlang sa programang para sa kapwa. Kung ayuda ang usapan, integridad ang dapat pairalin.