Mga lubak na nakamamatay, ayusin na, utang na loob!

@Editorial | October 1, 2022

Lubak sa kalsada ang isa sa mga problema na araw-araw na kinahaharap ng mga motorista.

Bukod sa nakadaragdag sa trapik dahil kailangang magbagal ang dumaraan, mapanganib pa sa mga puwedeng sumemplang.

Noong nakaraang linggo, isang motorcycle rider ang namatay sa Roxas Boulevard matapos mawalan ng balanse nang mapadaan sa lubak at magulungan ng isang trailer truck.

Ayon din sa isang traffic enforcer, marami nang naaksidente sa lugar, lalo na tuwing umuulan.

Madulas ang kalsada at kapag tumataas ang tubig, hindi nakikita ng mga motorista ang mga butas na maaaring madaanan.

Ayon naman sa Department of Public Works and Highways, patuloy ang rehabilitation sa mga kalsada sa Roxas Boulevard.

Ganito rin ang problema sa ilang probinsya na tila hindi nakikita ng mga opisyal ng gobyerno.

Marami nang post online ng mga aksidente pero dedma.

Isa umano sa dahilan kaya nasisira ang kalsada ay ang mga dumaraang overloaded na mga trak, baka naman puwede ring magkusa ang mga kumpanya ng mga 'yan sa pampagawa.

Hindi lang sapat ang sori sa mga motoristang dumaraan at napeperhuwisyo nang dahil sa lubak, kailangan ng mabilisang solusyon at pangmatagalan, hindi 'yung ginawa ngayon, bukas makalawa, sira na naman, malubak na naman.