Mga lalahok sa EDSA People Anniv, ‘wag takutin

by Info @Editorial | February 24, 2026

Sa ika-40 anibersaryo ng EDSA People Power Revolution, malinaw ang isang hamon: paano masisiguro ang kaligtasan ng lahat nang hindi sinasakal ang kalayaan ng mamamayan?

Ang paggunita sa EDSA People Power ay hindi simpleng okasyon. Simbolo ito ng tapang ng mga Pilipinong tumindig laban sa diktadura. Kaya kung may presensiya man ng pulis at militar, dapat malinaw: sila ay naroon para magbantay, hindi manakot.

Oo, kailangan ang seguridad. Malaking pagtitipon ang anibersaryo at posibleng magkaroon ng banta ng gulo o karahasan. Pero hindi dapat maging dahilan ang “seguridad” para higpitan ang permit, bantayan ang mga nagpoprotesta, o pigilan ang malayang pananalita. Ang EDSA ay mismong bunga ng karapatang magpahayag.

Simple ang punto: protektahan ang tao, igalang ang karapatan. Kung seryoso ang pamahalaan sa pag-alala sa People Power, dapat nitong patunayan na kaya nitong pagsabayin ang kaayusan at demokrasya. Dahil ang tunay na diwa ng EDSA ay hindi takot—kundi tapang at pagkakaisa.