Mga guro sa Taguig City, pagkakalooban ng internet allowance

ni Lolet Abania | July 15, 2020

Pagkakalooban ng pamahalaang Lungsod ng Taguig ang lahat ng mga guro sa pampubliko at pribadong paaralan ng internet allowance para sa isinusulong na distance learning ng Department of Education (DepEd).

Nais ng gobyerno ng Taguig City na pinamumunuan ni Mayor Lino Edgardo Cayetano, katuwang ang City Education Office na maibsan ang alalahanin ng mga guro ng private o public schools tungkol sa distance learning na sisimulan na sa Agosto.

Mapagtutuunan nang husto ng lahat ng teachers ang pagtuturo ng online learning kung saan ngayon lang mangyayari at hindi na nila iisipin pa ang panggastos para sa internet connection, ayon kay Cayetano.