Mga gumagamit ng online banking, magdoble-ingat

@Editorial | November 27, 2021

Marami nang Pinoy ang gumagamit ng online banking, lalo na ngayong panahon ng pandemya.

Malaking tulong dahil napapabilis ang mga transaksiyon tulad ng pagbabayad ng bills o pagta-transfer ng pera.

Ang problema, naging target na rin ito ng mga kawatan. Nakagagawa na rin sila ng paraan kung paano makakapagnakaw online.

Batay sa ulat, kadalasan umanong kinukuha ng mga kawatan ay ang personal na impormasyon ng biktima tulad ng pangalan, araw ng kapanganakan at password.

Gagawan nila ng paraan para makuha ang pera sa account ng biktima saka ita-transfer sa mga mules o account na stopover para mailipat naman sa ibang accounts.

May mga kawatan din na talagang kino-contact pa ang biktima tulad ng personal na pagtawag, pag-email o pagpapadala ng mensahe sa text, ipipilit na makakuha ng impormasyon na kanilang magagamit para ma-break ang security protocol ng bangko.

Kaya mainam na tawagan muna ang bangko at itanong kung may ganun talagang ginagawang pag-uusisa.

Sa panahon ngayon, talagang dumarami na ang mga kawatan. Lahat ng puwedeng istayl ay ginagawa na para makapanloko, kaya palaging magdoble-ingat.