Mga estudyante, mag-ingat at 'wag pasaway vs. COVID

@Editorial | August 20, 2022

All-systems go na ang Department of Education (DepEd) para sa pagbubukas ng klase sa Lunes, Agosto 22.

Nasa 27 milyong estudyante na umano ang nag-enroll para sa school year 2022-2023 o 96% ng target ng DepEd na 28.6 million enrollees.

Magpapatuloy ang enrollment hanggang sa mismong araw ng pasukan.

Umaasa tayo na magiging maayos at ligtas ang balik-eskwela. Batid natin natin kung gaano kasabik ang mga estudyante na makapasok na sa iskul at personal na makasama ang mga kaklase at titser.

Gayunman, dahil sa banta pa rin ng COVID-19, dapat na maging mas maingat. Kailangang magtulungan ang lahat para walang makalusot na virus sa iskul o kung mangyari man ay maging mabilis ang aksyon sa pagpigil na kumalat pa ito.

Panahon na para tayo naman ang kumontrol sa pandemya. Hindi na puwedeng matakot at maabala ang pamumuhay. Kung hindi tayo sasabay, hindi tayo makakausad.

Muli, paalala lalo na sa mga estudyante, mag-ingat at huwag pasaway, plis lang.