Mga dayuhang turista, ‘wag sanang pasaway, plis lang

@Editorial | November 26, 2021

Naka-standby na ang Bureau of Immigration (BI) sakaling magdesisyon ang pamahalaan na buksan ang Pilipinas para sa mga dayuhang turista.

Bagama’t, wala pang eksaktong petsa kung kailan muling bubuksan ang bansa para sa mga dayuhan, mas mainam nang handa.

Kailangang sapat ang manpower at facilities para sa mga protocols na kakailanganing ipatupad laban pa rin sa banta ng COVID-19.

Nauna nang inanunsiyo ng BI na hindi maaaring maghain ng vacation leave ang kanilang frontline personnel sa kasagsagan ng holiday season.

May 99 pang bagong immigration officers na kinuha para maitalaga sa iba’t ibang BI port at office sa bansa.

Masasabing magandang balita sakaling magbukas na ang bansa para sa mga dayuhang turista, dahil tuluyan nang sisigla ang ekonomiya.

Kaakibat nito, dapat pa ring maging istrikto sa mga protocols. Bawal ang shortcut, bawal ang nadadaan sa usapan, kumbaga bawal ang pasaway.

Sikapin nating maging tulong ang pagpasok ng mga turista at hindi maging dagdag-problema.