Mga 4Ps graduates, ‘wag hayaang bumalik sa hirap

by Info @Editorial | May 9, 2026

Iniulat ng Department of Social Welfare and Development na nasa 1.4 milyong benepisyaryo ng Pantawid Pamilyang Pilipino Program o 4Ps ang “naka-graduate” na mula sa programa. 

Kasabay nito, sinabi rin na mahigit 500,000 pamilya ang ibabalik o ire-restore bilang benepisyaryo. 

Ipinapakita lamang nito na bagama’t may mga pamilyang nakaahon na, marami pa rin ang nananatiling hirap sa pagtaas ng presyo ng bilihin, kakulangan sa trabaho, at iba pang krisis.

Magandang balita na may mga unti-unti nang nakakamit ang mas maayos na pamumuhay. Ngunit hindi dapat dito nagtatapos ang usapan. Mahalaga ring tiyakin kung tunay bang matatag at pangmatagalan ang kanilang pag-angat sa buhay.

Ang pagre-restore naman sa kalahating milyong pamilya ay malinaw na indikasyon na maraming Pilipino ang madaling bumalik sa kahirapan kapag humina ang kita o nawalan ng oportunidad. Dapat maging paalala ito sa pamahalaan na hindi sapat ang pansamantalang ayuda lamang. Kailangang palakasin ang paglikha ng trabaho, suportahan ang kabuhayan, at tiyakin ang access sa edukasyon at serbisyong pangkalusugan.

Hindi rin dapat maging batayan ng tagumpay ang dami lamang ng “graduates” sa 4Ps. Mas mahalagang masukat kung gaano karami ang tunay na naging matatag laban sa gutom at kahirapan.