ni Jasmin Joy Evangelista | October 9, 2021
Gagawaran ng parangal ng prestihiyosong Nobel Peace Prize ang beteranong mamamahayag at Rappler CEO na si Maria Ressa.
Ito ay para sa kaniyang laban para sa kalayaan sa pamamahayag sa bansa.
Ayon sa komite ng Nobel Peace Prize, gingamit ni Ressa ang kalayaan ng paghahayag para ilantad ang pang-aabuso at karahasan na laganap umano sa Pilipinas.
"[Ressa] uses freedom of expression to expose abuse of power, use of violence and growing authoritarianism in her native country, the Philippines," sabi nila sa pahayag.
Ginawaran din ng Nobel Peace Prize ang mamamahayag ng Russia na si Dmitry Muratov.
"Ms Ressa and Mr Muratov are receiving the Peace Prize for their courageous fight for freedom of expression in the Philippines and Russia," sabi ni chairwoman Berit Reiss-Andersen ng Norwegian Nobel Committee sa news conference.
Nagbigay-pugay naman si Ressa sa kanyang mga katrabaho sa Rappler dahil sa kanyang pagkapanalo.
Matatandaang hinatulang guilty si Ressa at ang isang researcher sa cyber libel dahil sa artikulo tungkol sa isang businessman na may kaugnayan umano sa mga umano'y iligal na aktibidad, at nahaharap sa kasong tax fraud, paglabag sa Securities Regulation Code at Anti-Dummy Law.