Mang-aabuso sa presyo ng bilihin, sampulan

by Info @Editorial | December 15, 2025

Hindi na bago ang problema sa mahal na bilihin tuwing Kapaskuhan. 

Bawat taon, paulit-ulit ang reklamo ng mamimili: mas mahal ang karne, mas kaunti ang nabibili, mas mabigat ang gastos. Sa ganitong panahon sinusubok kung may silbi ba talaga ang "bantay-presyo" ng gobyerno.

Kung may batas at patakaran, bakit tila walang takot ang ilang tindero sa pagtaas ng presyo? Simple ang sagot—kulang ang mahigpit na pagpapatupad. Kapag walang nag-iinspeksyon at walang napaparusahan, nagiging normal ang pananamantala.

Responsibilidad ng pamahalaan na tiyaking abot-kaya ang pangunahing bilihin, lalo na sa panahon ng Pasko at Bagong Taon. 

Samantala, may papel din ang mamamayan: maging mapagmatyag, magtanong at magsumbong. 

Ang Kapaskuhan ay panahon ng pag-asa, hindi ng dagdag-pasanin. 

Kung epektibo ang bantay-presyo, mas maraming pamilyang Pilipino ang makakapagdiwang kahit simple.